ARDNŞ sentyabrda Novorossiysk limanından 2 tankerlə 170 min ton Ural növlü neftin satışı üzrə tenderin bağlanma müddətini başqa tarixə keçirib. Bu barədə Trend ə şirkətdən məlumat verilib.
Bundan əvvəl tenderin avqustun 30-da bağlanması nəzərdə tutulurdu. Hazırda tarix avqustun 31-nə təyin olunub. 85 min ton həcmində 1-ci partiyanın sentyabrın 24-25-də, analoji həcmli 2-ci partiyanın isə sentyabrın 29-30-da göndərilməsi nəzərdə tutulur.
Avqustda ARDNŞ Novorossiyskdən 209 min ton Ural növlü neft satacaq. 131 min ton neftdən ibarət 1-ci partiya avqustun 28-29-da Glencore treyderi, 78 min ton həcmində 2-ci partiya isə avqustun 30-31-də Select Energy treyderi üçün yükləniləcək.
2004-cü ilə olan 2,559 mln tona qarşı 2005-ci ildə ARDNŞ Novorossiysk limanından 1,631 mln ton neft yükləyib.
2006-cı ilin əvvəllərindən ARDNŞ-in neftini Novorossiyskdən aşağıdakı şirkətlər alıb:
Yanvar - Glencore (85 min ton);
Fevral - Taurus Petroleum (140 min ton);
Fevral - Glencore (60 min ton);
May - Glencore (60 min ton);
İyun - Glencore (60 min ton);
İyul - Glencore (60 min ton);
Avqust - Glencore (131 min ton);
Avqust - Select Energy (78 min ton).