Əgər Koreya tərəfi "İnam" perspektiv strukturunda faiz payının bir hissəsinin satış layihəsi üzrə bizə yaxşı təklif etsə, o zaman Azərbaycan Dövlət Neft Şirkəti öz payının bir hissəsini satmağa razı ola bilər. Bu barədə Trend ə ARDNŞ prezidenti Rövnəq Abdullayev məlumat verib.
Onun sözlərinə görə, Azərbaycan bu layihədə 50% iştirak payına malikdir. Bu layihənin maliyyələşdirilməsini layihənin digər iştirakçıları - BP və Shell şirkətləri öz üzərinə götürüb. Beləliklə, ARDNŞ -in bu layihədə heç bir riski yoxdur və bu da onun payının dəyərini daha da artırır.
Əvvəl KNOC texniki qrupu BP nümayəndələri ilə görüş keçirib və Xəzərin Azərbaycan sektorunda "İnam" layihəsi üzrə texniki məlumatlar alıblar (Koreya tərəfi Azərbaycan Dövlət Neft Şirkətinin bu layihədəki 50% payının 20%-ni almaq iddiasındadır. ARDNŞ-dən başqa burada BP-25% - operator və Shell - 25% iştirak edir).
Koreya mütəxəssisləri tərəfindən keçirilmiş texniki məlumatların qiymətləndirmələrinə görə, "İnam" perspektiv strukturunda neft ehtiyatları çox yüksəkdir, lakin bu halda yatağın işlənməsi zamanı böyük risklər yaranır. KNOC ARDNŞ-ə bu layihədə ehtiyatları yenidən qiymətləndirməyi təklif edib.
Həmçinin Koreya korporasiyası Dövlət Neft Şirkətinə Qazaxıstan və Türkmənistandakı layihələrdə birgə iştirak etməyi təklif edib. O cümlədən, söhbət boru kəmərlərinin tikintisindən gedir. Bu layihələrin həyata keçirilməsi üzrə baza Bakıda yerləşə bilər.
