"Eurasia Energy" "Ələt-Dəniz blokunun reabilitasiyası və işlənilməsi planını hazırlamaq üçün bütün lazımi tədqiqatları baş çatdırdığını bildirib. Trend in xəbər verdiyi kimi, bu barədə "Eurasia Energy"nin yaydığı məlumatda deyilir.
Sənəddə qeyd edilir ki, şirkətin menecerləri, "TRACS International Consultancy Ltd". və "Genesis Oil and Gas Consultants Ltd." təmsilçiləri sentyabr ayında Bakıya iki dəfə səfər ediblər. Səfərlər zamanı ARDNŞ rəhbərliyi, geoloq və mühəndislərlə "Alət-Dəniz" yatağı üzrə görüşlər keçirilib. Həmçinin yataqdakı platforma, boru kəmərləri və xüsusi gəmilər təftiş olunub.
ARDNŞ-dən Trend ə bildirilib ki, "Ələt-Dəniz" üzrə PSA tipli müqavilənin bağlanması perspektivləri çərçivəsində Azərbaycan Dövlət Neft Şirkəti ilin sonuna qədər "Eurasia Energy" ilə əsas kommersiya prinsiplərini razılaşdırmaq niyyətindədir.
"Eurasia Energy"ni maraqlandıran blok "Ələt-Dəniz", "Hamamdağ-Dəniz", "Qarasu", "Səngi-Muğan", "Ülfət", "Aran-Dəniz", "Daşlı" və "Səbail" yataqlarından ibarətdir. "Blok" Bakıdan 70 km aradlıda dayazsulu sahilyanı ərazidə yerləşir.
"Eurasia Energy" adıçəkilən layihə çərçivəsində neft injinirinqi üzrə məsləhətçi qismində "TRACS International Consultancy Ltd." və "Genesis Oil and Gas Consultants Ltd." şirkətlərini cəlb edib.
"Blok"da suyun dərinliyi əsasən 20 metr təşkil edir və strukturun sonuna yaxın maksimum 50 metr səviyyəsinə çatır. "Ələt-Dəniz" 1983-cü ildə kəşf olunub və bu günə kimi burada 12,5 mln. barrel neft və 1 mlrd. m3 qaz hasil olunub. ARDNŞ-ın məlumatına əsasən, "Ələt-Dəniz"də çıxarılmamış karbohidrogen ehtiyatının həcmi 14 mln. barrel neft və1 mlrd. m3 qaz təşkil edir. Yatağın əsas məhsuldar horizontları 3700-4500 metr dərinlikdə yerləşir.
