Azərbaycan Dövlət Neft Şirkəti (ARDNŞ) Eurasia Energy Limited şirkəti ilə "Ələt-Dəniz" böyük dəniz blokunun işlənməsi üçün PSA tipli müqavilənin bağlanması perspektivləri üzrə memorandumu uzatmaqdan imtina edib. ARDNŞ-dən Trend ə verilən xəbərə görə, şirkət özü sərmayə qoymaq və bu yatağı işləmək niyyətindədir.
"Ələt-Dəniz" blokuna "Hamamdağ-Dəniz", "Qarasu", "Səngi-Muğan", "Ülfət", "Aran -Dəniz", "Daşlı" və "Səbail" yataqları daxildir. "Blok" Bakıdan təxminən 70 km aralıda dayaz sulu sahil sularında yerləşib.
ARDNŞ-in məlumatlarına görə, "Ələt-Dəniz"də qalan çıxarılacaq neft ehtiyatları 14 mln. barel neft və 1 mlrd. m3 qaz təşkil edir. Əsas məhsuldar laylar 3700-4500 metr dərinliyində yerləşir.
Eurasia Energy ilə "Qarşılıqlı anlaşma haqqında" memorandum 7 dekabr 2005-ci il tarixində imzalanıb, lakin tərəflər 7 dekabr 2006-cı il tarixinidək başlıca kommersiya prinsipləri üzrə razılığa gələ bilmədilər.
Eurasia Energy artıq reabilitasiya və dəniz blokunun işlənməsi planının hazırlanması üçün tədqiqatları başa çatdırıb. Eurasia Energy bu layihə çərçivəsində neft injinirinqi üzrə məsləhətçi qismində TRACS International Consultancy Ltd. və Genesis Oil and Gas Consultants Ltd. şirkətlərini cəlb edib.
"Blok"da suyun dərinliyi əsasən 20 metr təşkil edir və maksimal olaraq strukturun sonunda 50 metr səviyyəsinə çatır. "Ələt-Dəniz" 1983-cü ildə açılıb və bu günə qədər burada 12,5 mln. barel neft və 1 mlrd. m3 qaz hasil olunub.
