Bakı. Trend:
Bakı, Sumqayıt şəhərlərində və Abşeron yarımadasında COP29-a hazırlıq çərçivəsində hotel əməkdaşları üçün peşəkar təlimlərin keçirilməsi üzrə işlər başlayıb.
Trend xəbər verir ki, bu barədə bu gün Dövlət Turizm Agentliyinin sədr müavini Azadə Hüseynova COP29 müddətində xarici qonaqların yerləşdirilməsi və turizm imkanlarının təqdimatına həsr olunmuş mətbuat konfransında çıxışında deyib.
"Bakı və Sumqayıt şəhərlərində, eləcə də Abşeron yarımadasında COP29-a hazırlıq çərçivəsində xidmət keyfiyyətini artırmaq məqsədilə təqribən 300 hotelin 2 minə yaxın əməkdaşı üçün peşəkar təlimlərin keçirilməsi üzrə işlər başlayıb. Bundan başqa, 200 turist bələdçisinə təlim keçəcək və müvafiq sertifikatlar verəcəyik, dəstək məqsədilə isə mehmanxanalarda 1000-ə yaxın turizm könüllüsü yerləşdiriləcək", - o deyib.
Qeyd edək ki, BMT-nin İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyası (COP29) bu ilin noyabrında Azərbaycanda keçiriləcək. Bununla bağlı qərar COP28-in ötən il dekabrın 11–də Dubayda keçirilmiş plenar iclasında qəbul olunub. İki həftə ərzində Bakı dünyanın mərkəzinə çevriləcək və 70-80 minə yaxın xarici qonağı qəbul edəcək.
BMT İqlim Dəyişikliyi üzrə Çərçivə Konvensiyası insanın iqlim sisteminə təhlükəli müdaxiləsinin qarşısını almaq məqsədilə 1992-ci ilin iyununda Rio-de-Janeyro şəhərində keçirilmiş Yer Sammitində imzalanmış sazişdir. COP (Conference of Parties) abreviaturunun ingilis dilindən tərcüməsi Tərəflər Konfransı deməkdir.
Konvensiyanın tərəfləri 198 ölkədir. gər tərəflərin fərqli qərarı olmazsa, COP hər il keçirilir. COP-un ilk tədbiri 1995-ci ilin martında Berlində baş tutub, katibliyi Bonn şəhərində yerləşir.
(Tərcümə: Rəna Əbdürəhmanova)