Azərbaycan, Bakı, 28 yanvar / Trend , müxbir S.Babayeva/ Beynəlxalq Elektrorabitə İttfaqının (International Telecommunication Union) tövsiyələrinə əsasən, 2008-ci ildən Azərbaycanda rəqəmli teleyayıma fəal keçid başlayacaq. Bu barədə bazar ertəsi Azərbaycan Rabitə və İnformasiya Texnologiyaları Nazirliyinin dövlət müəssisələrinin fəaliyyətinin koordinasiyası şöbəsinin baş məsləhətçisi Qulam Abdullayev məlumat verib.
"Biz geniş proqramın (rəqəmli yayıma keçid proqramı) reallaşdırılması üçün lazımi işləri aparırıq", - o bildirib. Ölkə ərazisində avadanlıq qurulur.
Abdullayevin sözlərinə görə, ilin ortalarından ölkədə rəqəmli yayıma keçid əhəmiyyətli dərəcədə fəallaşdırılacaq.
Azərbaycanda rəqəmli teleyayıma keçid proqramı Nazirlər Kabinetinə ötən il təqdim olunub. O, üç mərhələdən ibarətdir. Birinci mərhələ 2007-2010, ikinci mərhələ 2011-2013, üçüncü mərhələ isə, 2014-2015-ci illəri əhatə edir.
İlkin olaraq, Bakı, Gəncə və Naxçıvanda, hər birində dörd kanal olmaqla, iki yayım paketi buraxılacaq, respublikada isə ümumilikdə bir paket tətbiq ediləcək. Beləliklə, əhalinin 60-70%-i rəqəmli yayım əhatəsinə daxil olacaq.
İkinci mərhələdə Bakı, Gəncə və Naxçıvanda rəqəmli yayımı genişləndirmək üçün daha əlavə bir paket tətbiq ediləcək. Nəticədə, fəaliyyətdə üç, bütün respublikada isə 2 paket olacaq. Bundan sonra əhalinin əhatə dairəsi 60-70%-dən 90%-dək artacaq.
Ümumilikdə 2013-cü ilədək üç 12 proqramlıq paketi istifadəyə vermək planlaşdırılır.
Sonuncu --üçüncü mərhələdə əlavə ötürücü quraşdırmaq yolu ilə yayımın keyfiyyətinin yaxşılaşdırmaq üzrə işləri reallaşdırmaq və əhalinin 98% əhatəsinə nail olmaq planlaşdırılır.
Nazirlikdə Azərbaycanda rəqəmli teleyayıma keçilməsini həm arzuolunan, həm də məcburi hesab edirlər. Azərbaycan bu məsələdə ləngiyərsə, şübhəsiz , bu, teleradioyayımın gələcəyinə mənfi təsir göstərəcək. Belə ki, artıq bütün dünyada rəqəmli teleyayıma keçid prosesi başlayıb.
Azərbaycanda rəqəmli teleyayım sistemi ilk dəfə olaraq pilot layihəsi kimi Bakıda, 2004-cü il oktyabrın 10-da həyata keçirilib.
