Azərbaycan, Bakı, 14 may/ Trend , müxbir S.Babayeva/ ABŞ Beynəlxalq İnkişaf Agentliyi (USAİD) və Azərbaycanın Rabitə və İnformasiya Texnologiyaları Nazirliyi İT sahəsində əməkdaşlıq üçün işçi qrupunun yaradılması haqqında qərar qəbul ediblər.
"Bu qərar nazir Əli Abbasovun USAİD-in Azərbaycan üzrə koordinatoru Skot Teylor və USAİD-in Bakı ofisinin baş iqtisadçısı Pol Devislə görşü zamanı qəbul edilib", - Rabitə Nazirliyi xəbər verir.
USAİD nümayəndələri görüşdə qeyd ediblər ki, agentliyin ölkədə informasiya texnologiyaları sahəsində apardığı monitorinq və analizlərin nəticələrindən razı qalıblar.
USAİD Azərbaycanda regional innovasiya zonasının yaradılmasında, müstəqil tənzimləyici strukturun formalaşdırılmasında, telekommunikasiya bazarının liberallaşdırılmasında və sektorun özəlləşdirilməsi üzrə layihələrə texniki yardımın həyata keçirilməsində, həmçinin, Azərbaycan-ABŞ hökumətlərarası komissiyasının iyunda keçiriləcək iclası çərçivəsində, ABŞ-ın belə layihələri dəstəkləməsinin təmin edilməsində maraqlıdır.