Azərbaycan, Bakı, 23 iyul/ Trend , müxbir S.Babayeva/Azərbaycan Rabitə və İnformasiya Texnologiyaları Nazirliyinin Aztelekom İstehsalat Birliyi Kürdəmir rayonunda NGN (Next Generation Network) rabitə şəbəkəsinin yaradılması üzrə tenderi təxirə salıb.
İB-dən verilən məlumata görə, rayonun və yaxın kəndlərin mərkəzi avtomatlaşdırılmış telefon stansiyasının NGN texnologiyası üzrə tam yenidən qurulması "Dövlət alışı haqqında"Qanunun (maddə 11.1 - tenderdə iştirak etmək üçün tender təkliflərini təqdim edən namizədlərin sayı üçdən az olduqda, alıcı təşkilat tenderin davam etdirilməsindən imtina edir və tender elanının verildiyi qəzet orqanında bu barədə məlumatı 5 bank günü ərzində dərc etdirir)11.1 maddəsinə uyğun olaraq, təxirə salınıb.
Tender təkilfli bağlamalarının açılması avqustun 15-nə keçirilib. Bununla bərabər, maraq göstərən şirkətlər təkliflərini avqustun 14-dək Kürdəmir rayon rabitə qovşağına təqdim etməlidirlər. Tenderdə iştirak şərti 3 min manatdır.
Analoji şəbəkə əvvəllər Şamaxıda və rayonun 23 kəndində tikilib istifadəyə verilib. Bundan sonra regionun bütün əhalisi İP-telefon, İnternet, televiziya və məlumat xidmətlərindən istifadə imkanı əldə edib. Bunun üçün bütün kənd və Şamaxı avtomatlaşdırılmış telefon stansiyalarında Sloveniya istehsalı Iskratel-in müvafiq avadanlığı quraşdırılıb.
NGN (gələcək nəslin şəbəkəsi) kommutasiya paketlərindən istifadə etməklə, sözün, görüntünün və məlumatların ötürülməsi üçün təyin olunan çoxməqsədli universal şəbəkədir. NGN şəbəkəsi telekommunikasiya trafikinin müxtəlif növləri üçün zəruri olan keyfiyyətli xidməti təmin edir. Yuxarıda adı çəkilən texnologiyanın tətbqi abonentlərə VoIP- telefoniya, səsli poçt, məlumatların ötürülməsi xidmətləri, multimedia xidmətləri, virtual şəxsi şəbəkələr, xəbərlərin vahid şəklə salınmış mübadiləsi, xəbərlərin tez mübadilə edilməsi, interaktiv ünsiyyət cavabı, interaktiv oyunlar, videkonfranslar və ev idarə etməsi sisteminin xidmətlərindən istifadə etməyə imkan verəcək.
