Azərbaycan, Bakı, 17 avqust / Trend , müxbir H.Vəliyev /
"Azərbaycanda çoxzolaqlı internet çıxış istifadəçilərinin sayı 43 mini keçib", - rabitə və informasiya texnologiyaları nazirinin müavini İltimas Məmmədovun Yeni Azərbaycan Partiyasının rəsmi saytında dərc olunan müsahibəsində deyilir.
Onun sözlərinə görə, hazırda Aztelekom şəbəkəsi üzrə çoxzolaqlı rabitə portlarının sayı 4744 ədəd, Bakı Telefon Rabitəsi İstehsalat Birliyinin şəbəkəsi üzrə 15400 ədəddir.
İstifadəçi sayının artımı marketinq təşəbbüsləri, satış və xidmət sisteminin təşkili, bazara yeni tarif planlarının çıxarılmasında operatorların müasir metodları hesabına mümkün olub.
Çoxzolaqlı çıxış xidmətinin üstünlükləri ayrı telefon xətti, geniş əhatə zonası, tarif planlarının çoxluğu və adi telefon xətti ilə əlavə servis və müasir telekommunikasiya xidmətləri əldə etmək imkanıdır.
İnternetə yüksək sürətli çıxış xidmətlərinin inkişafı Azərbaycanın rabitə operatorlarının prioritet istiqamətlərindən biri olaraq qalır. İlk növbədə provayderlər bu bazarın kütləvi seqmentinin əldə olunmasına çalışırlar. Şəbəkəyə çıxış servislərindən ən çox yayılanlarından biri, bazara 2004-cü ildə çıxarılmış ADSL texnologiyasıdır. Bu gün bu xidmət artan templə inkişaf edir və yaxın gələcəkdə mövcud qoşulmaları (Dial up) əvəzləmək niyyətindədir.
Məqalə müəllifi ilə əlaqə ünvanı: [email protected]
