Azərbaycan, Bakı, 5 sentyabr / Trend , müxbir H.Vəliyev /
"Xalq kompüteri" layihəsinin ikinci mərhələsi səkkiz min kompüterin satışını nəzərdə tutur, Təhsil Nazirliyi məlumat verib.
"Xalq kompüteri" layihəsi çərçivəsində təklif edilən kompüterlər yalnız müəllimlər üçün nəzərdə tutulub. İndiyədək 30 minə qədər müəllim yeni texnologiya ilə işləyə bilmək üçün treninqlər keçiblər.
Təhsil Nazirliyinin məlumatına görə, yaxın iki ildə Azərbaycan məktəbləri dörd min portativ kompüter alacaqlar.
Statistikaya görə, bugün ölkədə 29 şagirdə bir, Bakıda isə 15-17 şagirdə bir kompüter düşür.
Məktəblərin kompüterləşdirilməsi proyektinin reallaşması üçün 2008-2012-ci illərdə 8,5 milyon manat xərclənəcək.
Məktəblərin kompüterləşdirilməsi Azərbaycan prezidenti İlham Əliyevin 10 iyun 2008-ci il tarixli sərəncamı ilə təsdiq olunmuş 2008-2012-ci illərdə təhsil sisteminin informasiyalaşdırılması dövlət proqramı çərçivəsində həyata keçirilir.
Təhsil sisteminin kompüterləşdirilməsinə "2005-2007-ci illər ərzində respublikanın ümumtəhsil məktəblərinin rabitə informasiya texnologiyaları ilə təminatı proqramının təsdiq ediılməsi barədə" fərmanla 2005-ci ildə start verilib.
Proqramın əsas məqsədi İT-dən istifadə etməklə təhsilin keyfiyyətini artırmaq üçün vahid təhsil informasiya mühitinin yaradılması və ölkənin dünya təhsil sisteminə inteqrasiyasıdır. Bu da öz növbəsində ölkənin təhsil sistemini effektli idarə etməyə və qlobal şəbəkə vasitəsilə xarici ölkələrin təhsil müəssisələri ilə əlaqə yaratmağa imkan verir.
Məqalə müəllifi ilə əlaqə ünvanı: [email protected]