Azərbaycan, Bakı, 08 sentyabr / Trend , müxbir H.Vəliyev /
Oktyabrın 14-16-da Bakıda informasiya-kommunikasiya texnologiyalarından (İKT) istifadə üzrə üçüncü beynəlxalq konfrans - AICT2009 keçiriləcək. Bu barədə Trend -a Qafqaz Universitetinin Hesablama kompleksləri, sistemləri və şəbəkələri kafedrasının müdiri Abzətdin Adamov bildirib.
AICT2009 konfransı Azərbaycanın Rabitə və İnformasiya Texnologiyaları Nazirliyi, Azərbaycan Milli Elmlər Akademiyasının İnformasiya Texnologiyaları İnstitutu, Qafqaz Universiteti, Bakı Dövlət Universiteti, Azərbaycan Texniki Universiteti tərəfindən Türkiyənin IEEE-dəki (Institute of Electrical and Electronics Engineers) şöbəsi ComSoc və Özbəkistanın IEEE regional şöbəsi ilə tərəfdaşlıq çərçivəsində təşkil ediləcək.
Adamovun sözlərinə əsasən, konfrans rabitə və informasiya texnologiyaları naziri Əli Abbasov və təhsil naziri Misir Mərdanovun sədrliyi ilə keçiriləcək. Konfrans texniki problemlərin geniş diapazonunu əhatə edir. Onların bir hissəsi internetə simsiz girişə artan marağa, üçüncü və dördüncü nəsil mobil texnologiyaların inkişafına əsaslanıb.
Konfrans çərçivəsində İKT-nin tibbdə və səhiyyədə, təhsildə, elmdə, humanitar və sosial sahələrdə, elektron hökumət üzrə dövlət strategiyasının hazırlanması və idarə edilməsində tətbiqi məsələləri nəzərdən keçiriləcək.
Əsas diqqət simsiz şəbəkələr (WLAN və Mobile WIMAX, 3G və 4G ), mobil şəbəkələrdə təhlükəsizlik sistemləri, CİS-sistem və WEB-texnologiyalarının qurulmasına yönəldilib.
Məqalə müəllifi ilə əlaqə ünvanı: [email protected]
