Azərbaycan, Bakı, 28 oktyabr / Trend , müxbir H.Vəliyev/
Mobil telefonların IMEI-kodlarının qeydiyyatının hüquqi bazası qüvvəyə mindikdən sonra proqram təminatı cihazı qoşulacaq ki, bununla da Azərbaycana qeyri-qanuni yollarla gətirilən mobil telefonların fəaliyyətinin qarşısı alınacaq. Bu barədə "Simbrella" şirkətinin baş direktoru Seymur Məmmədov Trend -a bildirib.
Hazırda sistemin analitik proqram hissəsi hazırdır. Məmmədovun sözlərinə görə, layihə mobil rabitə operatorları ilə razılaşdırılıb və hazırda məlumatların alınmasının detalları barədə danışıqlar aparılır.
Alınan məlumatların təhlükəsizliyi gündəlikdəki əsas məsələlərdəndir. Operatorlar əmin olmaq istəyirlər ki, onların təqdim etdikləri məlumatlar üçüncü şəxslər tərəfindən istifadə edilməyəcək.
Layihəyə dövlət idarələri də cəlb ediliblər. Ölkəyə gətirilən mobil telefonlara nəzarət və onların qeydiyyatı Dövlət Gömrük Komitəsi tərəfindən həyata keçirilir. Layihənin tənzimləyicisi Rabitə və İnformasiya Texnologiyaları Nazirliyiir.
Azərbaycana gətirilən mobil telefonların IMEI-kodlarının məlumat bazası daxil ediləcək. Qeydiyyat həm gömrük xidmətində, həm də şəbəkəyə qoşulan zaman həyata keçiriləcək.
Məlumat bazası formalaşandan sonra mobil telefon bazarı haqqında təsəvvür yaranacaq (bazarın həcmi, qanuni və qeyri-qanuni telefonların sayı və s.).
Hazırda Heydər Əliyev adına Beynəlxalq hava limanında mobil telefonların ölkəyə gətirilməsi zamanı onların IMEI-kodlarının könüllü qeydiyyatını aparmaq imkanı yaradılıb.
Yeni sistem oğurluq və mobil telefonların ölkəyə qeyri-qanuni ixracı ilə daha effektli mübarizə aparmağa imkan verir.
Məqalə müəllifi ilə əlaqə ünvanı: [email protected]
