Azərbaycan, Bakı, 6 dekabr /Trend, müxbir H.Vəliyev/
2011-ci ilin ilk aylarında Azərbaycanın mobil rabitə operatorları tərəfindən göstərilən rouminq xidmətləri üzrə tariflərin azaldılacağı gözlənilir. Bu barədə bazar ertəsi Azərbaycanın rabitə informasiya texnologiyaları naziri Əli Abbasov bildirib.
Nazirin sözlərinə görə, bu yaxınlarda Bakıda keçirilən Regional Rabitə Əməkdaşlığının (RRƏ) 43-cü iclası çərçivəsində MDB ölkələrinin rabitə administrasiyaları rouminq xidmətləri tariflərinin azaldılması məsələsi üzrə öz mobil rabitə operatorları ilə danışıqlar aparacaqlarını və bütün zəruri tədbirləri görəcəklərini yekdilliklə bildiriblər.
"Biz də bu işlərə başlamışıq və güman edirəm ki, 2011-ci ildə, yəni gələn ilin ilk aylarında xidmətlərin bu növü üzrə tariflərin azaldılmasına nail olacağıq", - nazir bildirib.
RRƏ çərçivəsində mobil rabitə operatorlarının təqdim etdikləri rouminq xidmətləri üzrə tariflərin azaldılması məsələlərinin həlli ilə məşğul olan işçi qrup yaradılıb.
RRƏ həm MDB, həm də Baltik və Şərqi Avropa ölkələrini birləşdirir. RƏƏ çərçivəsində yaradılan xüsusi işçi qrup birbaşa danışıqlar aparacaq.
Nazirin bir müddət əvvəl dediyi kimi, bu gün rouminq tarifləri əsassız olaraq yüksəkdir ki, bu da yolverilməzdir. Belə təşkilat çərçivəsində qərar qəbul etmək öz səmərəsini verə bilər. Çünki RRƏ tərkibinə daxil olan rabitə administrasiyaları mobil rabitə operatorlarına təsir etmək imkanlarına malikdirlər.
