Azərbaycan, Bakı, 21 dekabr /Trend, müxbir H.Vəliyev/
Azərbaycan Rabitə və İnformasiya Texnologiyaları Nazirliyinin "Teleradio" İstehsalat Birliyi Gəncədə rəqəmsal televiziyanın işə salınması üzrə işləri başa çatdırıb. Bu barədə Trend-ə çərşənbə axşamı "Teleradio" İB-nin baş direktoru Əflatun Şərifov deyib.
Onun sözlərinə görə, hazırda sistem tam sazlanıb və 10 televiziya kanalından ibarət rəqəmsal kontentdən (sosial paket) bu rayonun televiziya tamaşaçıları istifadə edə bilirlər.
"10 televiziya kanalından ibarət olacaq sosial paketin tərkibi hələ ki rəsmən təsdiqlənməyib. Lakin mövcud praktikaya əsasən, onun tərkibinə respublikanın əsas telekanalları daxil edilir. Bunlar AzTV, İctimai televiziya, ATV və "İdman Azərbaycan" və başqalarıdır. Hətta paket əsasən yerli telekanallardan ibarət olsa belə, ümumilikdə onların sayı 10 ədədə çatmır. Buna görə də rəqəmsal televiziyanın işə salındığı regionlarda paketlərə yerli televiziya kanalları daxil ediləcək. Məsələn, Gəncədə bu müqavilə əsasında rəqəmsal paketə daxil ediləcək "Kəpəz" telekanalı olacaq", - Şərifov bildirib.
İstehsalat Birliyinin rəhbərinin sözlərinə görə, Lerikdə anten-fider sisteminin quraşdırılması üzrə işlər də başa çatdırılıb. Şirvan rayonunda işlər başa çatmaq mərhələsindədir. "Teleradio" Lerik və Şirvanda iki ötürücü quraşdırmağı da planlaşdırır. Belə ki, bu iki rayon cənub regionları ilə birləşdirici halqa rolunu oynayır.