Azərbaycan, Bakı, 3 mart /Trend, müxbir H.Vəliyev/
Azərbaycan Rabitə və İnformasiya Texnologiyaları Nazirliyinin "Aztelekom" İstehsalat Birliyinin Gəncə Telekommuniksiya Qovşağı (TKQ) Sevinc və Qırmızı kənd qəsəbələrində iki ədəd mini 53/59 ATS-in qoşulması üzrə işlər aparır. Bu barədə cümə axşamı Trend-ə Gəncə TKQ rəisinin köməkçisi Yusif Zeynalov məlumat verib.
Zeynalovun sözlərinə görə, bu gün həmin qəsəbələrdəki telefon stansiyaları istismara tam hazırdır və onların kabel xətlərinin çəkilməsindən sonra təhvil veriləcəyi gözlənilir.
"İşlər başa çatdıqdan sonra Gəncədə stasionar rabitənin bütün şəbəkəsinin nömrə tutumunun yeddirəqəmli nömrələnmə sisteminə keçəcəyi gözlənilir", - Zeynalov bildirib.
Yeddirəqəmli nömrələnmə sisteminə keçidlə əlaqədar Gəncə şəhərinin telefon nömrələri "5" (554-xx-xx, 555-xx-xx və s.) indeksi ilə başlayacaq. Yeni nönrələnmə sistemi operatora ATS-in nömrə tutumu resursunu artırmağa imkan verəcək ki, bu da nömrə qıtlığı problemini həll edəcək.
Gəncə Bakı, Sumqayıt və Naxçıvandan sonra infrastrukturunun inkişafı yeddirəqəmli nömrələnmənin tətbiqini tələb edən dördüncü şəhər olacaq.
