Azərbaycan, Bakı, 16 mart /Trend, müxbir H.Vəliyev/
Azərbaycan Milli Elmlər Akademiyasının İnformasiya Texnologiyaları İnstitutu Litvanın informasiya təhlükəsizliyi sahəsindəki təcrübəsini öyrənir. Bu barədə cümə günü Trend-ə institutdan bildiriblər.
Məsələ instutut rəhbərliyi ilə Litvanın Rabitənin Tənzimlənməsi Xidmətinin informasiya və şəbəkələrin müdafiəsi üzrə şöbə müdiri Ritis Raynis arasında müzakirə edilib.
Tərəflər informasiya təhlkəsizliyi, beynəlxalq səviyyədə AZ-CERT kompüter insidentlərinə qarşı komanda reaksiyasının tanınmasının genişləndirilməsi sahəsində təcrübə mübadiləsi haqqında razılıq əldə ediblər.
Bu gün AZ-CERT-in Trans-Avropa Elmi-Araşdırma Assosiasiyası və təhsil müəssisələrində (TERENA) akkreditasiyası var.
AZ-CERT-in funksiyaları "AzScienceNet" elmi kompüter şəbəkəsini əhatə edir. Komanda reaksiyasının sərəncamında ayrıca şəbəkə, öz serveri var. Server insidentlər üzrə qeydiyyat aparır, uçota alır və sifarişləri işləyir.
Raynisin sözlərinə görə, intensiv qloballaşma prosesi haker hücumları, zərərli proqramlar və kibercinayətkarlıqla mübarizədə innovasiya xarakterli yanaşma tələb edir. Bütün bu aspektlər təhlükəsizlik məsələlərində və bu gün Litvada hazırlanan kibercinayətkarlıq üzrə milli strategiyada vacib yer tutur.
O qeyd edib ki, şəbəkə və informasiya təhlükəsizliyi sahəsində innovasiya və rəqabətqabilliyətli xidmətlərin göstərilməsi vacib meyardır və Litvanın Rabitənin Tənzimlənməsi Xidmətinin informasiya və şəbəkələrin müdafiəsi üzrə şöbəsi Azərbaycana bu sahədə dəstək verməyə hazırdır.