Azərbaycan, Bakı, 8 avqust /Trend, müxbir Hüseyn Vəliyev/
Rabitə və Yüksək Texnologiyalar Nazirliyinin Dövlət Radiotezliklər İdarəsi (DRİ) Bakıda və Abşeron yarımadasında Mərkəzləşdirilmiş Avtomatlaşdırılmış Radiomonitorinq Şəbəkəsini (MARŞ) istismara verib. Bu barədə cümə günü Trend-ə DRİ-dən deyiblər.
Hazırda MARŞ-ın 3 ədəd stasionar və 1 ədəd mobil avadanlığı işə salınıb. Stasionar avadanlıqlar Bakının Mehdiabad, Yeni Günəşli və Sahil qəsəbələrindəli MARŞ məntəqələrində quraşdırılıb.
DRİ-dən qeyd ediblər ki, quraşdırılan avadanlıq qismən istifadə olunur: "Tam avtomatlaşdırılmış sistemin yaradılması üçün əlavə maliyyə vəsaiti lazımdır".
Qeyd edək ki, MARŞ tezlik resurslarından istifadə üzrə nəzarəti gücləndirməyə və onların qanunsuz istifadəsi ilə səmərəli mübarizə aparmağa imkan verir. Hazırda Azərbaycanda ümumilikdə 14 radiomonitorinq məntəqəsi işə salınıb ki, bunun 9-u rayonlardadır.
