Azərbaycanda superkompüter mərkəzinin yaradılması layihəsi təxminən $10-12 mln. dəyərində qiymətləndirilir. Trend in Rabitə və İnformasiya Texnologiyaları Nazirliyinin mətbuat xidmətinə istinadən xəbər verdiyi kimi, superkompüterlərlə təchiz olunmuş mərkəz 2005-2008-ci illərdə Azərbaycanda rabitə və informasiya texnologiyalarının inkişafı üzrə dövlət proqramı ("Elektoron Azərbaycan") çərçivəsində yaradılacaq. Layihə gerçəkləşdirildikdən sonra qəzetlərin, televiziyaların elektron arxivi yaradılacaq ki, bu da gələcəkdə vaxt itkisinə yol vermədən bu ehtiyatlardan istifadə etməyə imkan verəcək.
Bütövlükdə "Elektron Azərbaycan" dövlət proqramına daxil edilmiş layihələrin dəyəri $372 mln qiymətləndirilir. Hazırda proqram çərçivəsində təkcə Dünya Bankı ilə maliyyə xidmətlərinin inkişafı üzrə layihə gerçəkləşdirilir. Bu layihənin əsas komponentini Azərbaycanda poçt sisteminin təkmilləşdirilməsi təşkil edir.
Proqramda nəzərdə tutulan tədbirlərin həyata keçirilməsi nəticəsində müasir tələblərə cavab verən rabitə və informasiya texnologiyaları infrastrukturunun təşkili, yeni texnologiyaların mənimsənilməsi və informasiyalı cəmiyyətə keçidin əsaslarının yaradılması gözlənilir.
