Azərbaycan, Bakı /müx. Trend S.Babayeva/ Dünyanın iri peyk qurumları Azərbaycanın milli rabitə peykinin buraxılmasını nəzərdə tutan "Azərsat" layihəsinə maraq göstərirlər. Bu barədə çərşənbə axşamı Rabitə və İnformasiya Texnologiyaları Nazirliyinin dövlət idarələrinin fəaliyyətinin koordinasiya şöbəsinin baş məsləhətçisi Qulam Abdullayev məlumat verib.
Onun sözlərinə görə, hazırda "Intelsat", "Eutelsat" və "Intersputnik"lə danışıqlar aparılır. Həmin şirkətlər peykin hazırlanması, onun orbitdə yerləşdirilməsi ilə bağlı təkliflər verir.
Bu gün texniki detalların razılaşdırılması məqsədilə peyk qurumlarından məsləhətlər və təkliflərin qəbulu prosesi gedir. Bu proses daha 3 ay çəkəcək.
"Bizim niyyətlərimiz hələ ki, heç kəsdə narazılıq doğurmur. Özü də, irəlidə hələ 3 ay var. Həmin müddət ərzində bütün müraciətlər hazırlanacaq və sonra Beynəlxalq Elektrik Rabitə İttifaqına (İTU) təqdim ediləcək" - deyə Abdullayev bildirib.
ITU artıq Azərbaycanın təkliflərini qəbul edib və onları peyk işi ilə məşğul olan təşkilatlar arasında yayıb.
Abdullayevin fikrincə, görülən işlərin real nəticəsini 3 ildən tez əldə etmək mümkün olmayacaq. Ən geci bu proses 7 il çəkə bilər. Məhz bu qədər vaxt lazımdır ki, rabitə peyki hazırlansın və orbitə buraxılsın.
80-100 milyon dollar həcmində dəyərləndirilən layihənin maliyyə mənbələri hələ müəyyən edilməyib.
