Bakı. Trend:
Yaponiya hökuməti təxminən 900 km mənzilli JASSM-ER qanadlı raketlərini daşımaq məqsədilə Hava Özünümüdafiə Qüvvələrinə məxsus F-15 qırıcılarının bir hissəsini təkmilləşdirməyi planlaşdırır.
Trend xəbər verir ki, bu barədə məlumatı “Asahi” qəzeti yayıb.
Qəzetin yazdığına görə, ilkin layihə xərcləri 1,5 dəfə artaraq 1 trilyon yeni (təxminən 6,8 milyard dollar) keçib. Bu da təkmilləşdirilmiş təyyarələrin döyüş istifadəsinə verilmə tarixinin gecikməsinə səbəb ola bilər.
Təkmilləşdirmə planı 2019-cu ildən hazırlanmağa başlayıb, lakin 2021-ci ildə artan xərclər səbəbilə yenidən nəzərdən keçirilib. Son qiymətləndirməyə görə, 2025-ci ilin martına qədər büdcə 1,016 trilyon yenə çatıb.
Nəticədə, Yaponiya Müdafiə Nazirliyi istehsalçılara təyyarələrin 2027-ci maliyyə ilində (1 aprel 2027 – 31 mart 2028) döyüş istifadəsinə verilməsinin təxirə salına biləcəyini, hətta 2028-ci ildə də mümkün olmaya biləcəyini bildirib.
Layihəyə əsasən, 200 ədəd F-15 təyyarəsindən 68-i modernləşdiriləcək. Təyyarələr JASSM-ER raketləri, yeni radar sistemləri və elektron müharibə texnologiyaları ilə təchiz ediləcək. Bu modernləşmə Çinin artan dəniz hərbi aktivliyinə qarşı əsas tədbir kimi qiymətləndirilir.
Modernləşdirmə layihəsi ABŞ-Yaponiya müdafiə əməkdaşlığı çərçivəsində həyata keçirilir və ölkənin uzun mənzilli hücum qabiliyyətlərini artırmağa yönəlib.