Azərbaycan, Bakı, 20 aprel / Trend , müxbir D.Xatınoğlu/
Əfqanıstan Prezident Administrasiyasının rəsmisi Əhməd Ziya Siyamək Hirəvi (Ahmad Zia Siamak Hirawi) Trend -a bildirib ki, Əfqanıstanın təhlükəsizliyi ilə bağlı növbəti beynəlxalq konfransın Kabildə keçiriləcəyi planlaşdırılır. Bununla bağlı 60-dan çox ölkə və beynəxalq təşkilatdan nümayəndələr bu konfransda iştirak etmək üçün dəvət olunub.
Prezident Administrasiyasının mətbuat katibi Hirəvi aprelin 20-də telefonla Kabildən bildirib ki, bu konfransda Əfqanıstana beynəlxalq ictimaiyyətin yardımlarının vacibliyi, Əfqanıstanda fəaliyyət göstərən xarici qüvvələr və şirkətlərin öz planları və proqramlarını yerli hakimiyyətlə uyğunlaşdırması və daha effektiv fəaliyyətləri, həmçinin ölkənin təhlükəsizliyi müzakirə olunacaq.
Hirəvinin sözlərinə görə, konfrans may ayının sonunda keçiriləcək, dəqiq tarix hələ müəyyənləşdirilməyib.
Əfqanıstan Prezident Administrasiyasının rəsmisi İranın bundan əvvəlki konfransda iştirak etməməsini tənqid edib. "Biz bilirik ki, İranın Britaniya və ABŞ ilə problemləri var, lakin bu problemlər Tehranın Kabillə əməkdaşlığına və konfranslarda iştirakına mane olmamalıdır", - o deyib.
Hirəvi əlavə edib ki, Əfqanıstandakı sabitliyin region ölkələrinin, o cümlədən İranın təhlükəsizliyinə birbaşa təsiri var, buna görə də İran qonşu ölkə kimi Əfqanıstanın təhlükəsizliyi ilə bağlı tədbirlərə daha aktiv qoşulmalıdır.