Azərbaycan, Bakı, 31 mart /Trend/
Rusiyalı hərbçi Valeri Permyakovun Gümrüdə erməni ailəsini qərtə yetirməsi ilə bağlı iş üzrə keçirilmiş dindirmələrin yekununda Gümrüdəki Rusiya hərbi bazasının idarəçiliyi ilə əlaqəsi olan 18 nəfər işdən qovulub.
Trend-in Ermənistan mətbuatına istinadən verdiyi məlumata əsasən, bu iş üzrə Rusiya və Ermənistanın istintaq orqanlarının dindirdiyi insanların sayı 4228-ə çatıb.
Məlumata görə, işdən qovulanlar arasında Rusiyanın Ermənistandakı 102-ci hərbi bazasının fəaliyyətini birbaşa kurasiya edən Rusiya Müdafiə Nazirliyinin vəzifəli şəxsi də var: "Lakin dindirmələr zamanı nəinki bütün suallara cavab alınmayıb, hətta yeni suallar yaranıb".
Qeyd edək ki, V. Permyakov yanvarın 12-də bir erməni ailəsinin avtomat silahla 6 üzvünü qətlə yetirib və 6 aylıq uşağı yaralayıb. Sonradan körpə xəstəxanda dünyasını dəyişib.