Bakı. Trend:
Yəmənin üsyançı Ənsar Allah hərəkatına bağlı husilər, Qırmızı dənizdə ABŞ-ın "USS Harry Truman" təyyarədaşıyan gəmisinə raket və dronlarla hücum ediblər.
Trend xəbər verir ki, bu barədə husilərin silahlı qüvvələrinin nümayəndəsi Yəhya Səriya məlumat yayıb.
Səriyanın verdiyi məlumata görə, Yəmənin raket və pilotsuz uçan aparat qüvvələri birgə hərbi əməliyyat keçirərək, iki qanadlı raket və dörd pilotsuz təyyarə ilə Qırmızı dənizin şimalında yerləşən ABŞ-ın "USS Harry Truman" aviadaşıyıcısına hücum edib.
Hərəkatın sözçüsü həmçinin bildirib ki, hücum zamanı Amerikanın təyyarədaşıyan qrupu Yəməndə Ənsar Allahın nəzarətində olan ərazilərə hücum etməyə hazırlaşırmış. Əməliyyatın məqsədi bu hücumun qarşısını almaq olub və buna müvəffəq olublar.