Bakı. Trend:
ABŞPrezidenti Donald Trampın müxtəlif ölkələrdən, o cümlədən Çindən idxala tətbiq etdiyi yüksək rüsumlar "iPhone" modellərinin qiymətində 30-40 faiz artıma səbəb ola bilər.
Trend xəbər verir ki, bu barədə "Reuters" agentliyi məlumat yayıb.
Məlumata əsasən, "iPhone" smartfonlarının əksəriyyəti hələ də Çində istehsal olunur, və ABŞ bu ölkədən idxal olunan məhsullara 54 faizədək rüsum tətbiq edib.
Bu artım nəticəsində, hazırda 799 dollara (təxminən 1 360 manat) satılan "iPhone 16"nın baza modelinin qiyməti 1 142 dollara (təxminən 1 941 manat) qədər yüksələ bilər.
Eyni zamanda, 1 599 dollar (təxminən 2 720 manat) dəyərində olan və 6.9 düymlük ekranla, 1 TB yaddaşla təchiz edilmiş "iPhone 16 Pro Max" modelinin qiyməti 2 300 dollara (təxminən 3 900 manat) qədər bahalaşa bilər.
Mütəxəssislər bildirirlər ki, bu cür qiymət artımları həm istehlakçılar, həm də Apple şirkətinin satış gəlirləri üçün ciddi mənfi təsir yarada bilər.