Bakı. Trend:
İsveçrənin Davos şəhərində keçirilən Dünya İqtisadi Forumunun (DİF) qurucusu və icraçı sədri Klaus Şvab qəyyumlar şurasının sədri vəzifəsindən tədricən ayrılmaq prosesinə başlayır.
Trend xəbər verir ki, bu barədə “Financial Times” qəzeti məktuba və mənbələrə istinadən məlumat yayıb.
Qeyd olunur ki, 2024-cü ilin mayında Şvabın qəyyumlar şurasının sədri postundan ayrılaraq qeyri-icraçı sədr olacağı açıqlanmışdı. İyunda isə “The Wall Street Journal” DİF əməkdaşlarının Şvabı və rəhbərliyi qadınlara və qaradərililərə qarşı ayrı-seçkilik və qısnama ilə ittiham etdiyinə dair iddialar yayımlamışdı.
“Financial Times”ın əldə etdiyi məktubda 87 yaşlı Şvab bildirib ki, Forum dünyadakı çaxnaşmalardan sonra öz “missiya hissini” bərpa etməlidir. O, bu böhranın Donald Trampın ABŞ-də ikinci prezidentlik perspektivi ilə, yoxsa DİF-ə qarşı təhqiqatlarla bağlı olub-olmadığını açıqlamayıb.
Şvab konkret olaraq gedəcəyi vaxtı bildirməsə də, DİF-in açıqlamasında bu prosesin ən geci 2027-ci ilin yanvarına qədər başa çatacağı qeyd olunub.
İqtisadçı deyib ki, uyğun zamanda qəyyumlar şurasına öz varisi ilə bağlı təklif təqdim edəcək.
Qəyyumlar şurasının üzvləri sırasında nüfuzlu fiqurlar – Avropa Mərkəzi Bankının prezidenti Kristin Laqard, IMF-in rəhbəri Kristalina Georgieva, “Reliance Industries”in rəhbəri Mukeş Ambani, “BlackRock”un baş direktoru Larri Fink və “Salesforce”un baş direktoru Mark Benioff yer alır.