Bakı. Trend:
İngiltərənin cənub sahilində yerləşən Qərbi Sasseks çimərliklərində istirahət edənlər qeyri-adi mənzərə ilə qarşılaşıblar. Yük gəmisindən düşən konteynerlərdən dənizə yayılan banan dəstələri sahilə çıxıb.
Trend xəbər verir ki, bu barədə "The Guardian" nəşri məlumat yayıb.
Məlumata görə, Vayt adası ilə Britaniya materiki arasında hərəkət edən “Baltic Klipper” adlı soyuducu yük gəmisindən 16 konteyner dənizdə itib. Hadisə müvəqqəti olaraq gəmi marşrutlarının pozulmasına səbəb olub və “P&O Cruises Iona” kruiz laynerinin Sauthemptondan yola düşməsi təxirə salınıb.
Səlahiyyətli qurumların bildirdiyinə görə, itən konteynerlərdən səkkizi bananla, ikisi banan, biri avokado ilə yüklü olub, beşi isə boş vəziyyətdə olub. Bəzi konteynerlər zədələnərək partlayıb və meyvələr suyun üzərinə çıxaraq sahilə doğru üzməyə başlayıb.
Sahil Mühafizəsi ictimaiyyətə xatırladıb ki, gəmi qəzaları nəticəsində tapılan bütün əşyalar mütləq şəkildə dağıntıların qəbuluna cavabdeh olan şəxsə, yəni Britaniya hökumətinin müvafiq nümayəndəsinə bildirilməlidir.
Qaydalara əsasən, tapıntı barədə 28 gün ərzində məlumat verilmədikdə 2500 funt sterlinqədək cərimə tətbiq oluna bilər. Lakin daha sonra menecerin ofisi yükün tez xarab olan məhsullardan ibarət olduğunu nəzərə alaraq bu konkret halda hər hansı tədbirin görülməsinə ehtiyac olmadığını açıqlayıb.