Bakı. Trend:
ABŞ konqresmenləri çərşənbə günü Rusiya və onun müttəfiqlərinə Ukraynaya qarşı müharibədəki roluna görə yeni sanksiyaların tətbiqini nəzərdə tutan qanun layihəsini təsdiqləyiblər. Sənəd artıq Senat tərəfindən qəbul edilib və Donald Tramp tərəfindən dəstəklənir. ABŞ tərəfindən ilk dəfə Rusiyanın “kölgə donanmasına” qarşı tədbirlərin görülməsini nəzərdə tutan qanun layihəsi 262 lehinə, 159 əleyhinə səslə qəbul edilib və respublikaçı prezidentin hakimiyyətə qayıtmasından sonra ABŞ Konqresinin Moskvaya qarşı ilk genişmiqyaslı addımıdır.
Qanun layihəsi, həmçinin Rusiyanın enerji və müdafiə sektorlarına qarşı tədbirlər görülməsini, Rusiya Prezidenti Vladimir Putinə və digər yüksək vəzifəli şəxslərə qarşı sanksiyaların tətbiqini nəzərdə tutur. Sənəd, əsasən, ABŞ prezidentinə Rusiya qazı və neftinin ən böyük beş idxalçısı olan ölkələrə, o cümlədən Çin və Hindistana 100 faizə qədər gömrük rüsumları tətbiq etmək səlahiyyəti verir. Bu müddəa qanun layihəsinin qəbulunu əngəlləyə bilər.
Demokrat konqresmenlər Ukraynaya dəstək tədbirlərini dəstəkləyirlər, lakin Donald Trampa onun əsas iqtisadi aləti olan bu əlavə gömrük rüsumları ilə bağlı geniş səlahiyyətlərin verilməsinə ehtiyatla yanaşırlar.
Buna baxmayaraq, demokrat senatorlar bu tədbirləri böyük əksəriyyətlə dəstəkləyiblər və nəticədə avqustun əvvəlində Senatda qanun layihəsinin 86 lehinə, 11 əleyhinə səslə qəbul edilməsinə nail olunub. Sənədin tərəfdarlarının fikrincə, Rusiya və onun, hətta dolayı yolla da olsa, müttəfiqlərinə qarşı sanksiyaların sərtləşdirilməsi Moskvanın Ukraynaya zərbələri artırdığı bir vaxtda zəruridir. Çərşənbə günü Rusiyanın ölkənin cənubunda avtobusa pilotsuz uçuş aparatı ilə hücumu nəticəsində azı 5 nəfər də həlak olub. Ukrayna Prezidenti Volodimir Zelenski, xüsusilə iyul ayında Vaşinqtona səfəri zamanı qanun layihəsinə dəstək vermək üçün səylər göstərib.
Qanun layihəsi onun əsas müəllifi olan, iyul ayında vəfat etmiş respublikaçı senator Lindsi Qrehemin adını daşıyır. O, Ukraynanın qətiyyətli tərəfdarı, Rusiya və İranın sərt tənqidçisi olub. İran da sənəddə nəzərdə tutulan tədbirlərin hədəfləri sırasındadır. Qrehem bu qanun layihəsinin qəbuluna 2025-ci ilin aprelindən etibarən çalışırdı. Lakin Donald Tramp Konqresə səlahiyyət verməkdənsə, tədbirləri özü görməyə üstünlük verdiyindən qanun layihəsinin irəliləməsini ləngidirdi. Yalnız yayın əvvəlində əldə olunan razılaşmadan sonra onun Senatda təsdiqlənməsi mümkün olub.
Nümayəndələr Palatası zaman baxımından tələsir. Belə ki, konqresmenlər noyabrın 3-də keçiriləcək aralıq seçkiləri üçün kampaniya aparmaq məqsədilə tezliklə Vaşinqtonu tərk etməlidirlər.
“Qanun layihəsi sürətlə imzalandıqdan və qüvvəyə mindikdən sonra ümid edirik ki, ABŞ Kremlin müharibə xəzinəsini maliyyələşdirən maliyyə axınlarına son qoymaq üçün onun ciddi şəkildə tətbiq olunmasını təmin edəcək”, - deyə Razom We Stand təşkilatının direktoru Svitlana Romanko bildirib.
“Gecikdirilən hər gün Ukraynada daha çox insanı dəfn etməli olduğumuz bir gündür”, - deyə o əlavə edib.
