Bakı. İlhamə İsabalayeva - Trend:
Sosial media intihar fikirlərini geniş yayır və onu adiləşdirir. Biz bu məsələdən narahat olmalıyıq.
Trend-in məlumatına görə, bunu beynəlxalq ekspert Mişel Mur "İntiharların qarşısının alınması" mövzusunda dəyirmi masada deyib.
Onun sözlərinə görə, intihar haqqındakı düşüncələr xüsusilə gənclər üçün təhlükəlidir:
"İntihar öz həyatına son qoymaq əməlidir. Bəzən bu haqda danışmaq çox çətindir. İstənilən intihar halı faciədir. Biz intiharların qarşısının alınması üçün strategiya hazırlaya bilərik. Gənclər arasında intihar yoluxucu fenomendir. Adətən gənclər inkişaf yaşında bəzən çaşqınlıq içərisində olurlar. Onları bu fikirdən yayındırmaq lazımdır. İntiharların qarşısını almaq mümkündür. Düşünürəm ki, Azərbaycanda bu məsələ ətrafında görülən iş, Milli Fəaliyyət Planının hazırlanması intiharın qarşısının alınmasına töhfə verəcək".