Azərbaycan, Bakı, 08 fevral / Trend , müxbir K.Zərbalıyeva/
Azərbaycan paytaxtında qarlı və şaxtalı hava şəraiti ilə əlaqədar 57 nəfər təcili yardıma müraciət edib.
Bakı şəhər Təcili Tibbi Yardım Stansiyası baş həkiminin müavini Rauf Nağıyev bazar ertəsi Trend -a bildirib ki, müraciət edənlərin 50 nəfəri xəstəxanalara yerləşdirilib.
Onlar müxtəlif dərəcəli sınıqlar, xəsarətlər alıblar. 7 nəfərə isə ilk tibbi yardım göstərilib.
Nağıyev bildirib ki, xəsarət alanların əksəriyyəti orta yaş həddində olanlardır. Təcili yardıma müraciət edənlərin arasında məktəbli uşaqlar yoxdur.
Fevralın 4-dən 5-nə keçən gecədən başlayaraq Azərbaycanın əksər ərazilərində, o cümlədən Bakıda güclü qar yağmağa başlayıb. Ekologiya və Təbii Sərvətlər Milli Hidrometeorologiya Departamenti xəbərdarlıq edib ki, Azərbaycanda buzlu və anomal hava şəraiti fevralın 8-nə kimi davam edəcək.