Azərbaycan, Bakı, 13 aprel /Trend/
Minskin "Oktyabrskaya" metro stansiyasında insan tələfatı ilə nəticələnən terror aktı ilə əlaqədar Belarusun Azərbaycandakı səfirliyində başsağlığı kitabı açılıb. Bu barədə çərşənbə günü Trend-ə diplomatik missiyadan məlumat verilib.
Minsk metropoliteninin "Oktyabrskaya" stansiyasında partlayış metroda sərnişinlərin çox olduğu bir vaxtda - bazar ertəsi axşam baş verib. Son məlumatlara görə, 12 nəfər həlak olub, 157 nəfər xəstəxanaya yerləşdirilib. Onlardan 26-sının vəziyyəti ağırdır.
Faciə ilə əlaqədar Azərbaycanın rəsmi şəxsləri, ziyalıları və ictimaiyyət nümayəndələri artıq Belarus səfirliyinə gələrək, Belarus xalqının dərdinə şərik və ona dəstək olduqlarını bildiriblər.