Bakı. Trend:
İyunun 5-də daxil olan müraciətlər əsasında aparılan araşdırmalar nəticəsində bir sıra şəxslərin bank hesablarından qanunsuz yolla pul vəsaitlərinin çıxarıldığı müəyyən olunub. Oğurlanmış məbləğlər arasında 2200, 1950, 1050, 940, 580, 300, 252, 226, 202, 200, 200, 128, 101 və 65 manat kimi rəqəmlər qeydə alınıb.
Trend xəbər verir ki, bu barədə Daxili İşlər Nazirliyinin vətəndaşlara müraciətində bildirilib.
Müraciətdə bildirilib ki, bu cür cinayət halları adətən naməlum
nömrələrdən gələn zəng və SMS-lər, habelə saxta saytlar və
platformalar vasitəsilə həyata keçirilir. Şəxsi bank kartı
məlumatlarını, xüsusilə, kartın nömrəsini, PIN kodunu, CVV kodunu
və bir dəfəlik təsdiq (OTP) şifrələrini heç bir halda digər
şəxslərlə, o cümlədən özünü bank və ya dövlət qurumu əməkdaşı kimi
təqdim edən şəxslərlə paylaşmaq olmaz.