Azərbaycan, Gəncə, 01 iyul / Trend , müxbir V.Məmmədov/ Ərazilərin Minlardan Təmizlənməsi üzrə Milli Agentliyin (ANAMA) Göygöl rayonunda yerləşən Regional Təlim Bazasında yeni istehkamçılar (minatəmizləyən) hazırlanıb. Bu barədə Trend -a məlumat verən ANAMA-nın Əməliyyatlar üzrə meneceri Samir Poladov bildirib ki, yeni 23 nəfər müdavimə 6 həftə ərzində bazada yerli mütəxəssislər təlimlər keçib. Onlara minalar və partlamamış döyüş sursatları ilə davranış qaydaları öyrədilib. Poladovun bildirdiynə görə, təlimləri başa vuran istehkamçılar ölkə ərazisindəki mina və partlamamış döyüş sursatlarının təmizlənməsi əməliyyatlarına cəlb olunacaqlar.
"ANNAMA-nın himayəsi altında fəaliyyət göstərən "Beynəlxalq Avrasiya Mətbuat Fondu" və "Dayaq" təşkilatlarının hər birində 38 nəfərdən ibarət minatəmizləyən heyəti var. Digər istehkamçı qrupları Ağstafada partlamamış döyüş sursatlarının zərərsizləşdirilməsi və Fizuli rayonunun işğaldan azad edilmiş ərazilərində minaların təmizlənməsi ilə məşğul olur. Eyni zamanda, ANAMA-nın 13 nəfərlik çevik əməliyat dəstəsi də fəaliyyət göstərir", - Poladov bildirib.
Onun sözlərinə görə, təlimləri başa vuran müdavimlər istehkamçı dəstələrində vakant yerlərdə işlə təmin olunacaqlar
Gəncə paytaxt Bakıdan 365 kilometr qərbdə yerləşir.
Məqalə müəllifi ilə əlaqə ünvanı: [email protected]