Ermənistan KİV Azərbaycan və Ermənistan qoşunlarının təmas xəttində silahlı insident haqqında məlumat verib
Ermənistan KİV Azərbaycan və Ermənistan qoşunlarının təmas xəttində şənbə günü səhər baş verən silahlı insident haqqında məlumat verib. İnsident nəticəsində bir neçə nəfər xəsarət alıb.
Bu məlumatı Azərbaycan Müdafiə Nazirliyində nə təsdiq, nə də təkzib etmək hələ ki mümkün olmayıb.
İki Cənubi Qafqaz ölkəsi arasında münaqişə 1988-ci ildə Ermənistanın Azərbaycana qarşı ərazi iddiası irəli sürməsi zəminində yaranıb. Azərbaycan torpaqlarının iyirmi faizi, yəni Dağlıq Qarabağ ərazisi və bu əraziyə bitişik yeddi rayon Ermənistan silahlı qüvvələrinin işğalı altındadır.
1994-cü ildə tərəflər atəşkəs rejiminə dair razılaşma əldə ediblər və o vaxtdan bəri ATƏT-in Minsk qrupunun himayəsi altında, Rusiya, Fransa və ABŞ-ın həmsədrliyi ilə hələ də nəticəsiz sülh danışıqları aparılır.
BMT Təhlükəsizlik Şurasının Dağlıq Qarabağ və ətraf rayonların azad edilməsinə dair qəbul etdiyi dörd qətnaməni Ermənistan bu günə qədər yerinə yetirməyib.
