Bakı. Elena Kosolapova - Trend:
"Tamamilə aydındır ki, Dağlıq Qarabağ münaqişəsində status-kvo artıq saxlanıla bilməz. Nəyisə dəyişmək lazımdır, həm də çox tez". Bunu Trend-ə Avropa Siyasi Mərkəzinin analitiki Amanda Pol deyib.
Onun sözlərinə görə, Ermənistan-Azərbaycan, Dağlıq Qarabağ münaqişəsi zonasında vəziyyət çox ciddidir: "Hazırda təmas xətti çox hərbiləşdirilib. Hər iki tərəfdə ağır hərbi texnika, tanklar, təyyarələr, pilotsuz təyyarələr, çox sayda müasir hərbi texnika yığılıb ki, bu da vəziyyətin əvvəlkindən daha ciddi olduğunu bir daha göstərir".
Ekspert bildirib ki, hazırkı vəziyyət beynəlxalq ictimaiyyət, xüsusilə ABŞ və Rusiya tərəfindən diqqətli baxış tələb edir: "Təsir gücünə malik digər regional oyunçular da vəziyyətin nizamlanmasında iştirak edə bilərlər. Əgər münaqişə yenidən canlansa, bütün region bundan əziyyət çəkəcək, ona görə də məsələyə vahid yanaşma vacibdir".
Xanım A.Polun sözlərinə görə, Rusiya münaqişədən öz məqsədləri üçün istifadə edir ki, bu da həll yolunu tapmağa və ya regional təhlükəsizliyi təmin etməyə kömək etmir: "Rusiyaya münaqişənin saxlanması sərf edir, çünki bu, Moskvanın regionda öz təsirini genişləndirməyə imkan verir".
Ekspert vurğulayıb ki, status-kvonun saxlanması Azərbaycanı məyus edir, çünki işğal altında olan öz əraziləridir: "Ona görə də heç təəccüblü deyil ki, status-kvonun saxlanması ermənilər üçün daha əlverişlidir".