Serbiya prezidenti: Kosovo məsələsi ilə bağlı qərar Cənubi Qafqazdakı vəziyyəti dəyişə bilər
Fransa, Strasburq/ Trend müxbir A.İsmayılova/ Kosovo məsələsi ilə bağlı qərar Cənubi Qafqazdakı vəziyyəti dəyişə bilər. Bunu bazar ertəsi Strasburqda Serbiyanın prezidenti, Avropa Şurası Nazirlər Komitəsinin sədri Boris Tadiç bildirib.
Avropa Şurası siyasi biliklər məktəbinin dinləyiciləri qarşısında çıxış edən Tadiç bildirib ki, Cənubi Qafqazdakı münaqişəklərin həlli Kosovo məsələsinin həllindən asılı olacaq.
Onun fikrincə, Kosovo digər münaqişələr üçün presedent ola bilər. O, Kosovonun müstəqillik almayacağına ümid etdiyini bildirib.
Serbiya prezidenti əlavə edib ki, Kosovo məsələsinin həllindən asılı olmayaraq, o, Serbiyanın ərazi bütölüyünün təmin olunmasının tərəfdarıdır.
O qeyd edib ki, Kosovo ilə bağlı düşünülməmiş qərarlar bir çox sahələrdə, xüsusilə energetika sahəsində problemlər yarada bilər. Tadiç hesab edir ki, Kosovo məsələsi Dağlıq Qarabağ, Abxaziya, Türkiyə, Ukrayna, Rumıniya münaqişələri ilə oxşardır. O, Qara dəniz ölkələinin hamısının eyni problemlə qarşılaşdığını qeyd edib.
Serbiya prezidenti münaqişənin diqqətlə öyrənilməsinin lazım olduğunu söyləyib. Onun fikrincə, məmurlar vəziyyəti kifayət qədər təhlil etmirlər. "Münaqişələrin tənzimlənməsindən danışarkən tarixə köklənmək lazım deyil", - deyə Boris Tadiç bəyan edib.
