Azərbaycan, Bakı, 04 mart / Trend , müxbir Q.Cəbiyev/ Azərbaysanda səfərdə olan Şimali Kipr Türk Cümhuriyyətinin parlamentdə təmsil olunan siyasi partiyalarının təmsilçiləri gənclər və idman naziri Azad Rəhimovla görüşüblər. Bu barədə çərşənbə axşamı Trend a hakim Yeni Azərbaycan Partiyası (YAP) Gənclər Birliyinin sədri Ramil Həsənov məlumat verib.
Səfər YAP-ın dəvəti ilə reallaşıb. Nümayəndə heyətinin tərkibinə Şimali Kiprin hakim Cümhuriyyət Türk, Ulusal Birlik, Özgürlük və Reform partiyaları Gənclər Birliklərinin rəhbərləri daxildir.
Həsənov bildirib ki, Rəhimovla görüşdə gənclər və idman sahəsində əlaqələr diqqət mərkəzində olub. Müzakirələrdə Azərbaycan idmançılarının Şimali Kiprdə təlim- məşq toplantıları keçirməsi, Azərbaycanda keçirilən yarışlara Şimali Kiprin idmançılarının dəvət edilməsi kimi məsələlər nəzərdən keçrilib.
Nümayəndə heyəti sabah hakim partiyanın sədr müavini və icra katibi Əli Əhmədovla görüşəcək. Martın 7-dək davam edəcək səfər zamanı qonaqlar Şimali Kipr Türk Cümhuriyyətinin Bakı nümayəndəliyinə baş çəkəcək və Lənkəranda səfərdə olacaqlar.
