Müxalifət partiyalarının məşvərət qurumunda bir neçə blok yarana bilər
Azərbaycan, Bakı, 28 aprel / Trend , müxbir S.İlhamqızı/ Beş partiyanın təmsil olunduğu məşvərət qurumu daxilində bir neçə blok yarana bilər. Bu barədə Trend a Tərəqqi Partiyasının sədri Çingiz Dəmiroğlu açıqlama verib.
Müxalifəti təmsil edən ADP, AMİP, Müsavat, Tərəqqi partiyaları, Azərbaycan Naminə İctimai Forum mütəmadi toplanaraq məşvərət aparırlar. "Beşlər" çərçivəsində artıq Müsavat başqanı İsa Qəmbər, ADP sədri Sərdar Cəlaloğlu builin oktyabrında keçiriləcək prezident seçkisində namizəd olacağını bəyan ediblər, qalan üç nəfər partiyanın liderlərinin prezidentliyə namizəd olub-olmayacağı hələlik hələlik müəyyənləşməyib.
Dəmiroğlunun sözlərinə görə, "beşlər" prezident seçkisində bu qurum çərçivəsində əməkdaşlıq edəcək, bir-birinin seçki kampaniyasına mane olmayacaqlar. Lakin qurum daxilində prezidentliyə bir neçə nəfər iddialı olduğuna görə "beşlər" vahid namizəd məsələsini müzakirə etmirlər: "Məşvərət qurumu seçki blokuna çevrilə bilər, amma vahid deyil, bir neçə bloka. Bu zaman məşvərət qurumu üzvləri hansı namizədə dəstək verəcəyini özü müəyyənləşdirməli, digər namizədə isə əngəl olmamalıdır"-deyə Tərəqqi Partiyasının sədri bildirib.
Dəmiroğlunun sözlərinə görə, Tərəqqi Partiyasının təmsil olunduğu ATA bloku prezidentliyə onun namizədliyini irəli sürüb. Lakin Tərəqqi Partiyası seçkiyə az müddət qalmış Müsavat Partiyasının namizədinə dəstək verə bilər: "Əgər Müsavat Partiyası sonadək real mübarizə aparsa, indiki iqtidar üçün güclü rəqib olsa, ona dəstək verəcəyik"-deyə Dəmiroğlu bildirib.
Müəlliflə əlaqə saxlamaq üçün elektron ünvan - [email protected]
