Azərbaycan, Bakı, 01 may / Trend , müxbir S.İlhamqızı/ Yeni formalaşan Azərbaycan Sosialist Partiyası (ASP) zəhmətkeşləri öz sosial-iqtisadi və vətəndaş hüquqları uğrunda mübarizə aparmağa çağırır. Bu barədə partiyanın 1 may - Zəhmətkeşlər günü münasibəti ilə cümə axşamı qəbul etdiyi müraciətdə bildirilir.
Partiya Azərbaycan zəhmətkeşlərini inhisarçılığa, qiymətlərin əsassız şəkildə qaldırılmasına, vətəndaşların qanunsuz işdən çıxarılmasına etiraz etməyə, habelə müstəqil həmkarlar ittifaqları yaratmağa çağırır. Sosialistlər Azərbaycan xalqını Zəhmətkeşlər günü münasibəti ilə təbrik edib və zəhmət adamlarını kapitalist istismarının yaratdığı sosial və iqtisadi çətinliklər qarşısında həmrəyliyi gücləndirməyə səsləyib.
Partiyanın Müvəqqəti Mərkəzi İcraiyyə Komitəsinin (MMİK) bugünkü iclasında həmçinin ASP Təşkilat Komitəsinin sədri Rüstəm Şahsuvarov MMİK sədri vəzifəsinə seçilib.
Şahsuvarov və tərəfdarları bundan əvvəl Azərbaycan Kommunist Partiyasında təmsil olunublar. Ötən il partiya sədri Ramiz Əhmədovun vəfatından sonra partiyada daxili narazılıqlar və parçalanma baş verib. Kommunistlərdən ayrılan Şahsuvarov və tərəfdarları özlərinin yeni partiyasını yaradırlar.
Müəlliflə əlaqə saxlamaq üçün elektron ünvan - [email protected]
