Azərbaycan, Bakı, 12 iyun/ Trend , müxbir G.Əhmədova, D.Xatınoğlu/ Əfqanıstanın ACBAR dövlət təşkilatının rəhbəri Ancade Bir xarici donor yardımının xərclənməsi ilə bağlı başlıca problemi ölkədə təhlükəsizliyin pis təmin olunmasında görür. "Təhlükəsizliklə əlaqədar problemlərə görə, Əfqanıstandakı bir çox gəlirli xarici şirkətlər kifayət qədər tez-tez qısamüddətli müqavilələr bağlayırlar", - Əfqanıstana Yardım üçün Təşkilatların Koordinasiyası üzrə Agentliyin (Agency Coordinating Body for Afghan Relief - ACBAR) rəhbəri Bir (Anjade Beer) Trend -a bildirib.
Agentlik rəhbərinin sözlərinə görə, donor pulları ilə bağlı problemin digər hissəsi tədarüklərin tənzimlənməsidir. "Madii mallar Əfqanıstanda deyil, ölkədən kənarda alınır. Bu isə o deməkdir ki, donoların Əfqanıstan üçün ayırdıqları vəsait ölkədə qalmır - bu və ya digər halda geri qayıdır", - Bir cümə axşamı telefonla Parisdən bildirib.
"Lakin Əfqanıstanda çox kapital qalsaydı, bu ölkə iqtisadiyyatına stimul verərdi", - Agentlik rəhbəri hesab edir.
Birin sözlərinə görə, Əfqanıstanda fəaliyyət göstərən xarici şirkət və təşkilatlar ölkə hökuməti qarşısında hesabat verməyə dair öhdəlik götürməyiblər. "Buna görə də, beynəlxalq maliyyə şirkətlərinin Əfqanıstanda bərpa işlərinə nə qədər pul xərclədikləri barədə aydın təsəvvür yoxdur. Ölkə hökuməti də razıdır ki, donor təşkilatlarından daxil olan maliyyə vəsaitlərinin daha yaxşı idarəetmə üsulu olmalıdır", - əfqan təşkilatının rəhbəri hesab edir.
Birin sözlərinə görə, məsələ yalnız ölkədə bərpa işlərinin maliyyələşdirilməsindən ibarət deyil. "Məsələ həm də onadır ki, xərclənilməsi nəzərdə tutulan beynəlxalq donor yardımı, faktlarda öz təsdiqini tapmalıdır", - o əlavə edib.
Bu gün Parisdə Əfqanıstanın bərpa edilməsinə maliyyə yardımının göstərilməsi üzrə beynəlxalq konfrans işə başlayır. Konfransda Fransa prezidenti Nikolya Sarkozi, Əfqanıstan prezidenti Həmid Kərzayi, BMT-nin Baş katibi Pan Qi Mun, 60-dan çox nümayəndə heyətinin təmsilçiləri iştirak edəcək.
Əfqanıstan prezidenti Parisdəki konfrans zamanı ölkəsinə 50 mlrd. dollar həcmində yardım göstərilməsi barədə xahişlə dünya ictimaiyyətinə müraciət edəcək.
