Azərbaycan, Bakı, 24 iyun/ Trend , müxbir E.Babayev/ Azərbaycan Milli Məclisinin Müdafiə və təhlükəsilik məsələləri daimi komissiyası Hərbi Doktrinanın qəbulunun ləngiməsi səbəblərini açıqlayıb. "Bu gün bizim müdafiə qabiliyyətimizin möhkəmləndirilməsi üçün çox səmərəli işlər görülür və hər dəfə yeni nüanslar ortaya çıxır. Həmin nüansları Hərbi Doktrinada əks etdirmək çox yaxşı olardı" - çərşənbə axşamı Trend -a komissiyanın sədr müavini Aydın Mirzəzadə bildirib.
Trend -un arayışı: Milli Məclisin yaz sessiyası bu ayın sonunda başa çatır. Azərbaycan parlamentinin ayın sonunadək iki iclasının keçirilməsi nəzərdə tutulur. İndiyə qədər Hərbi Doktrina Milli Məclisə daxil olmayıb. Hərbi Doktrinada Azərbaycan üçün təhlükə mənbəyi və düşmən ölkələr göstərilməlidir. Eyni zamanda, Hərbi Doktrina ölkəyə qarşı yönələn hərbi təhlükələri müəyyənləşdirən, çeşidləyən, onun təsnifatını verən və müvafiq hökumət strukturlarının vəzifələrini müəyyən edən sənəddir. Hərbi Doktrinaya əsasən, orduda müqavilə əsasında hərbi xidmət keçmə prinsipi tətbiq edilir. Sənəddə ordu quruculuğunun bütün sahələri - hərbi sənayenin qurulması, beynəlxalq hərbi əməkdaşlıq kimi məsələlər də əks olunur.
Mirzəzadənin sözlərinə görə, Hərbi Doktrina Azərbaycanın inkişaf səviyyəsini, müdafiə qabiliyyətini özündə əks etdirən sənəd olacaq. "Bu gün tələsik hansısa bir sənədi qəbul etmək olar, amma həmin sənədə bir neçə ildən sonra dəyişiklik etmək zərurəti yaransa, onun əhəmiyyəti itə bilər" - deyən Mirzəzadə onu da bildirib ki, gecikmənin olması heç də prosesin ləngiməsi demək deyil.
Məqalə müəllifi ilə əlaqə ünvanı: [email protected]
