Azərbaycan, Bakı, 03 noyabr / Trend , müxbir C.Babayeva/ Azərbaycanın solçu qüvvələrinin birliyinin yaradılması barədə ilkin razılıq əldə olunub.
Bazar günü Azərbaycan Sosialist Partiyası, Azərbaycan Kommunist Partiyası, Azərbaycan Vahid Kommunist Partiyası və Marksizm-Leninizm platformasında Azərbaycan Kommunist Partiyasının sədrlərinin keçirilən görüşündə sol düşərgədə mövcud boşluğun aradan qaldırılması üçün bütün sol yönümlü partiyaların bir araya gəlməsinin vacibliyi qeyd olunub, - Trend -a bazar ertəsi AKP-dən məlumat verilib.
Görüşdə partiya sədrləri qarşıdan gələn bələdiyyə və parlament seçkilərində vahid platformadan çıxış etməyin mühüm əhəmiyyət kəsb etdiyini nəzərə alaraq, gələcəkdə yaradılması nəzərdə tutulan sol qüvvələr birliyinin Nizamnamə və Əsasnaməsinin hazırlanması barədə də ilkin razılıq əldə ediblər.
Partiya sədrləri səviyyəsində qeyri-rəsmi görüşlərin mütəmadi keçirilməsi barədə də razılıq əldə olunub.
Azərbaycanda heç vaxt solçu partiyaların bloku olmayıb. Bu istiqamətdə təşəbbüslər irəli sürülsə də, razılıq əldə olunmayıb.
Məqalə müəllifi ilə əlaqə saxlamaq üçün ünvan: [email protected]