Azərbaycan, Bakı, 11 noyabr / Trend müxbir C.Babayeva/ Azərbaycan ziyalıları iqtidar və müxalifət arasında dialoqun baş tutması üçün vasitəçi olmağa hazırdırlar.
"Ziyalıların ali məqsədlərindən biri iqtidar-müxalifət münasibətlərində düşmənçiliyi aradan qaldırmaqdır. İqtidar və müxalifət arasında dialoqa vasitəçilik etməyə həmişə hazırıq", - deyə Azərbaycan Ziyalıları Birliyinin (AZB) sədri Eldəniz Quliyev çərşənbə axşamı Trend -a bildirib.
Trend -un arayışı: 2005-ci ilin parlament seçkiləri ərəfəsində ATƏT-in Bakı ofisinin vasitəçiliyi ilə müxalifət, hakim və hakimiyyətyönlü partiyalar arasında bir necə görüş keçirilib. Sonradan dialoqu davam etdirmək mümkün olmayıb. Bu il oktyabrın 15-də keçirilən prezident seçkisində bir neçə müxalifət partiyası YAP-ın namizədini dəstəkləyib. Seçkidən sonra YAP-ın bu partiyalarla dialoqu məsələsi yenidən gündəmə gəlib.
Azərbaycanın hakim Yeni Azərbaycan Partiyası icra katibinin müavini, deputat Siyavuş Novruzov Trend -a bildirib ki, partiya müxalifətlə heç bir şərt irəli sürmədən dialoqa hazırdır.
Quliyevin fikrincə, dialoqun baş tutması üçün məsuliyyət üçüncü tərəfin üzərinə qoyulmalıdır. "İlk addımı nə iqtidar, nə də müxalifət atmalıdır. Müstəqil, mütərrəqi fikirli və heç bir siyasi ambisiyası olmayan ziyalı zümrəsi ilk addımı bir şərtlə ata bilər. Dialoq ambisiyasız, şərtsiz baş tutmalı və hər iki tərəf siyasi iradə nümayiş etdirməlidir", - deyə o bildirib.
Onun sözlərinə görə, dialoqun baş tutmamasının səbəbi hər iki tərəfin bir-birinə eyni rəngdə - qara rəngdə baxmasıdır. "Azərbaycanda baş verən problemlərin, siyasi kataklizmlərin günahı həm iqtidar, həm də müxalifətdə var. Onların bir-birini həzm etməməsi, dialoq mədəniyyətinin olmaması dialoqun baş tutmasını əngəlləyir. Həm iqtidar, həm də müxalifət nümayəndələri müxtəlif tədbirlərdə normal söhbət edə bilirlər. Lakin milli mənafeyə uyğun məsələlərin müzakirəsinə şərt qoyurlar", - Quliyev deyib.
Qulliyev hesab edir ki, dialoqda cəmiyyətdə kifayət qədər tanınmış şəxsiyyətlər - Milli Birlik Hərəkatının lideri Lalə Şövkət, Azərbaycan Xalq Cəbhəsi Partiyasının sədri Əli Kərimli, Müsavat Partiyasının sədri İsa Qəmbər, "Azərbaycan Naminə" İctimai Forumun rəhbəri Eldar Namazov başda olmaqla, müxalifət və iqtidarı təmsil edən insanlar iştirak etməlidirlər. "İqtidarı hakim Yeni Azərbaycan Partiyasının rəhbərliyi təmsil etməməlidir. Hakim partiya bu gün nə qədər paradoksal olsa da, iqtidarı tamamilə təmsil etmir", - deyə o bildirib.
AZB sədri bu sahədə Rusiya təcrübəsindən yararlanmağın müsbət nəticə verəcəyinə inanır. "Rusiyada dövlət başçısı müxalifət təmsilçiləri ilə tez-tez müzakirələr aparır. Azərbaycan prezidenti müxalifət liderlərini dəvət edib açıq və səmimi söhbət edə bilər. Əminəm ki, bunun nəticəsində bir çox problemlər həllini tapa bilər", - Quliyev bildirib.
Trend -un arayışı: Azərbaycan Ziyalıları Hərəkatı 2003-cü ildə yaradılıb və 2007-ci ildə Ədliyyə Nazirliyində Azərbaycan Ziyalıları Birliyi kimi rəsmi qeydiyyatdan keçib. Təşkilatın məqsədi Azərbaycan ziyalılarının hüquqlarının müdafiəsi və müxalifətlə iqtidar arasında barışığa nail olmaqdır.
Məqalə müəllifi ilə əlaqə saxlamaq üçün ünvan: [email protected]
