Azərbaycan, Bakı, 04 dekabr/ Trend , müxbir A.Hüseynbala/ Azərbaycanın müxalif Demokrat Partiyası (ADP) müxalifətin koalisiyası üçün yeni birlik modeli təklif edib. Partiyanın sədri Azərbaycan müxalifətinin yeni birliyinin yalnız beş-altı partiyanın iştirakı ilə yaradılacağını mümkün sayır.
"Yeni blokda təmsil olunacaq partiyalar yüksək səviyyədə təşkilatlanmalı, mövqeləri üst-üstə düşməli və səmimi əməkdaşlığa hazır olmalıdırlar", - cümə axşamı TrenNews-a müxalif Azərbaycan Demokrat Partiyasının (ADP) sədri Sərdar Cəlaloğlu bildirib.
Trend - un arayışı: Müxalifətin Əməkdaşlıq Mərkəzində təmsil olunan Müsavat və Azərbaycan Xalq Cəbhəsi partiyaları müxalifətin gələcək əməkdaşlığını nəzərdə tutan layihələr hazırlayıblar.
Müxalifətin Əməkdaşlıq Mərkəzinə "Azadlıq" bloku (Azərbaycan Xalq Cəbhəsi, Liberal, Vətəndaş və İnkişaf partiyaları), Müsavat Partiaysı və "Azərbaycan Naminə" İctimai Forum (ANİF) daxildir. Sentyabrın əvvəlində bu siyasi təşkilatlar oktyabrın 15 - də keçirilən prezident seçkisini qanunsuz tanımaq barədə birgə bəyanat imzalayıblar. Bəyanatda prezident seçkisindən sonra formalaşacaq hakimiyyət qeyri-legitim elan edilib.
Seçkidən sonra müxalifətin daha geniş koalisiyada birləşməsi istiqamətində danışıqlar başlasa da, qarşılıqlı ittihamlar nəticəsində hələki müxalifətin geniş koalisiyasının yaranması baş tutmur.
Onun sözlərinə görə, Azərbaycanda çoxsaylı partiyaların iştirakı ilə blok yaratmağın heç bir xeyiri olmayacaq.
"Mənim yeni birlik üçün nəzərdə tutduğum partiyaları həm Azərbaycanda, həm də xaricdə real qüvvə kimi tanıyırlar", - Cəlaloğlu deyib.
Müxalif partiya sədrinin fikrincə, inteqrasiya olmayan yerdə birləşmədən danışmaq, siyasi qüvvələrin guya bu gün, sabah bir yerdə olacağını söyləmək cəmiyyəti aldatmaqdır. "Birliyin alınmamasının əsas səbəbi bəzi müxalif partiyaların bunu istəməməsi ilə bağlıdır", - ADP sədri vurğulayıb.
Sağ təmayüllü partiya olan ADP 1991-ci ildə Cəlaloğlu tərəfindən təsis edilib. Partiya 2007-ci ilin yanvarınadək iqtidara qarşı radikal müxalif mövqedə olub. Yanvarda ADP-nin hakimiyyətlə dialoq qurulması ilə bağlı yeni siyasi kursu qəbul edilib. Buna etiraz olaraq keçmiş sədr Rəsul Quliyev və tərəfdarları ADP-dən imtina edərək özlərinin Açıq Cəmiyyət Pariyasını yaradıblar. Məqalə müəllifi ilə əlaqə ünvanı: [email protected]