Azərbaycan, Bаkı, 30 mart / Trend , müxbir A.Hüseynbala /
Cənubi Azərbaycanda yaşayan soydaşlarımızın müxtəlif təzyiq və təqiblərlə üzləşməsi ilə bağlı məsələ Avropanın sağ partiyalarının birliyinin qurultayında müzakirəyə çıxarılacaq.
"Avropa Xalq Partiyasının qurultayında Avropadakı bütün sağ təmayüllü partiyaların nümayəndələri iştirak edəcək. Biz qurultayda Güney Azərbaycanda baş verən hadisələrlə bağlı sənəd yayacağıq", - bazar ertəsi Trend -a Güney Azərbaycan Forumunun sədri, Azərbaycan Milli İstiqlal Partiyasının (AMİP) lideri Etibar Məmmədov bildirib.
Trend -un arayışı: Güney Azərbaycanda 35 milyona yaxın soydaşımız yaşayır. Son zamanlar İran hakimiyyət orqanlarının soydaşlarımıza qarşı apardığı repressiyalar, müxtəlif müddətlərə həbsxanalara salınanların işgəncələrə məruz qalmasu faktları çoxalıb.
Məmmədovun sözlərinə görə, aprel ayının sonunda Polşanın paytaxtı Varşavada keçiriləcək qurultayda Azərbaycan nümayəndə heyətindən başqa Avropanın müxtəlif ölkələrində yaşayan soydaşlarımız da iştirak edəcək. "Biz istəyirik ki, Güney Azərbaycanda son illər baş verən hadisələr dünya ictimaiyyətinin diqqətinə konkret faktlarla çatdırılsın və problemin həlli üçün konkret addımlar atılsın", - AMİP lideri əlavə edib.
"Güney Azərbaycanda soydaşlarımızın üzləşdikləri təqib və təzyiqlərlə bağlı İranın Azərbaycandakı səfiri ilə görüşümüz hələ də baş tutmayıb", - bazar ertəsi Trend -a müxalif partiyaların yaratdığı Demokratiya Uğrunda İttifaqda (DUİ) təmsil olunan Azadlıq Partiyasının sədri Əhməd Oruc bildirib.
Onun sözlərinə görə, 2008-ci ilin dekabr ayından bəri səfirlikdə hər dəfə ittifaqda birləşən partiyaların nümayəndələri ilə görüşəcəklərini bildirsələr də, vədə əməl etmirlər. "Bundan əlavə, indiyədək nə İranın səfiri, nə də səfirliyin adından Güney Azərbaycanda az qala hər gün qeydə alınan qanunsuzluqlarla bağlı heç bir rəsmi mövqe açıqlanmır", - Oruc əlavə edib.
Azadlıq Partiyasının sədri problemlə bağlı yenidən beynəlxalq ictimaiyyətə, eləcə də İranın Azərbaycandakı səfirliyinə müraciət edəcəklərini deyib.
Dеmоkrаtiyа Uğrunda İttifаqı 2005-ci il parlamеnt seçkisindən sonra müxalifətçi Klassık Xalq Cəbhəsi, Azadlıq və Milli Demokratiya partiyaları yаrаdıb. 2008-ci il sеntyаbrın əvvəllərində Böyük Azərbаycаn, nоyаbr аyındа isə Хаlq pаrtiyаlаrı DUİ-yə üzv qəbul оlunub. İttifаq bu pаrtiyaların məşvərət və əməkdaşlıq qurumudur.
Məqalə müəllifi ilə əlaqə ünvanı: [email protected]
