Müxalifət partiyaları Azərbaycanın eks-prezidentini anıblar

Azərbaycan, Bakı, 24 iyun / Trend , müxbir C.Babayeva /

Azərbaycanın eks-prezidenti, milli azadlıq hərəkatının lideri Əbülfəz Elçibəyin doğum günü ilə bağlı müxalifət liderləri çərşənbə günü onun məzarını ziyarət ediblər.

Bu gün Azərbaycanın eks-prezidenti, milli azadlıq hərəkatının lideri Əbülfəz Elçibəyin 71 yaşı tamam olur. O 1938-ci ildə Naxçıvanda dünyaya gəlib

Məhz onun prezidentliyi dövründə sovet qoşunları ölkədən çıxarılıb, Azərbaycanın milli valyutası dövriyyəyə buraxılıb, ali məktəblərə qəbul imtahanlarında test üsulu tətbiq edilib.

Əbülfəz Elçibəy 2000-ci il avqustun 22-də Türkiyədə, müalicə olunduğu "Gülhanə" xəstəxanasında vəfat edib.

Anım mərasimində Müsavat, Klassik Xalq Cəbhəsi, Bütöv Xalq Cəbhəsi, "Azadlıq" blokuna daxil olan (Xalq Cəbhəsi, Vətəndaş və İnkişaf, Liberal) partiyalar iştirak edib.