Azərbaycan, Bakı, 25 iyun / Trend , müxbir A.Hüseynbala /
Azərbaycanın müxalif partiyasında bələdiyyə üzvlüyünə namizədlərin qeydiyyatına başlanılıb.
"Mərkəzi Seçki Qərargahının (MSQ) iclasında liberalyönlü partiyaların "Azad Azərbaycan" seçki blokunu təsis etməsi ilə bağlı hazırlığın birinci mərhələsinin uğurlu olduğu qeyd edilib", - cümə axşamı Trend -a Azərbaycan Liberal Demokrat Partiyasından (ALDP) bildirilib.
Trend -un arayışı: Azərbaycanda bələdiyyə seçkisi 2009-cu ilin dekabrında, parlament seçkisi isə 2010-cu ilin payızında keçirilməlidir. Bundan əvvəl iki dəfə - 1999 və 2004-cü illərdə yerli özünüidarəetmə orqanlarına seçkilər keçirilib.
Ötən ay Azərbaycan parlamentində "Bələdiyylərin birləşdirilməsi haqqında" qanun qəbul edilib. Qəbul edilən qanuna görə, Azərbaycanda bələdiyyələrin sayı 2757-dən 1766-ya enəcək.
MSQ-nın rəhbəri, partiya sədrinin birinci müavini Vahid Nəzərov deyib ki, bələdiyyə seçkilərində iştirak etmək üçün namizədlər partiyanın rayon təşkilatları tərəfindən qeydiyyatdan keçirilirlər. "Bundan başqa namizədlər üçün treninqlər təşkil olunur və onlar maarifləndirici vəsaitlərlə təmin olunurlar", - məlumatda qeyd edilir.
ALDP sədri Fuad Əliyev isə bələdiyyə seçkilərinə hazırlıqla bağlı rayon təşkilatlarının fəaliyyətinin qenişləndirilməsi və faəllaşması ilə bağlı bir sıra tapşırıqlar verib.
Bir müddət əvvəl ALDP 12 liberalyönlü partiyanın bələdiyyə seçkiləri ilə bağlı blokunun yaradılması təşəbbüsü ilə çıxış edib.
АLDP 1999-cı ildə yaradılıb. 2000-ci ildə partiyanın sədri Zakir Məmmədov vəfat etdikdən sonra 2001-ci ildə ALDP ikiyə bölünüb. Valeh Ibadov və Fuad Əliyev hər ikisi ALDP adına iddia ediblər. 2004-cü ildə Ali Məhkəmənin qərarı ilə Fuad Əliyevin rəhbərlik etdiyi partiya ALDP kimi tanınıb və dövlət qeydiyyatından keçib.
Məqalə müəllifi ilə əlaqə ünvanı: [email protected]
