Azərbaycan, Bakı, 09 noyabr / Trend , müxbir A.Hüseynbala/
Azərbaycanın müxalif Müsavat Partiyası Məclisinin sədri və Divan üzvü partiya başqanının "Yeni Müsavat" qəzetinin təsisçiliyindən imtinasının gecikdiyini düşünürlər.
"İsa Qəmbər bu addımı çoxdan atmalı idi və onun təsisçilikdən imtinası tamamilə doğru qərardır", - çərşənbə axşamı Trend -a Müsavat Partiyası Divanının üzvü Vurğun Əyyub bildirib.
Trend -un arayışı: Noyabrın 8-də "Yeni Müsavat" qəzetinin 20 illik yubileyi keçirilib. Müsavat Partiyasının başqanı İsa Qəmbər "Yeni Müsavat"ın təsisçiliyindən imtina etdiyini bildirib. O, qərarının yaxın günlərdə rəsmiləşəcəyini söyləyib və qəzetə gələcək fəaliyyətində uğurlar arzulayıb.
İsa Qəmbər 1989-cu il noyabrın 10-da yaradılmış "Yeni Müsavat"a 1993-cü ildən təsisçilik edirdi.
Əyyubun sözlərinə görə, partiyanın başqanı onsuz da qəzetin fəaliyyətinə qarışmırdı. "Lakin qəzetlə bağlı iradlar adətən Qəmbərin üzərinə yönəlirdi. Onun təsisçi kimi qalması isə qəzetin partiyanın orqanı olması demək deyildi. Bu mənada İsa bəyin qərarının doğru olduğunu düşünürəm", - Divan üzvü əlavə edib.
Müsavat funksioneri partiyalı mətbuatın tərəfdarı olmadığından, bundan sonra Müsavat başqanının hər hansı kütləvi informasiya təsis edəcəyinə də inanmır.
"Buna baxmayaraq partiyaların kütləvi informasiyaları ilə əlaqələri qurulmalıdr. Qəmbərin təsisçilikdən imtina etməsi də partiyanın informasiyalarının yayımında müəyyən çətinliklər yaradacaq. Bu səbəbdən bəlkə də hər hansı mətbuat orqanı haqqında düşünmək olar. Amma bunun tamamilə partiyanın orqanı olmasının tərəfdarı deyiləm", - Əyyub vurğulayıb.
"Başqanın bu qərarı nə qədər gecikmiş olsa da, demokratiya baxımından müsbət hesab edirəm. Ümumiyyətlə, hər hansı partiya liderinin qəzetə təsisçilik etməsi düzgün deyil", - çərşənbə axşamı Trend -a Müsavat Partiyası Məclisinin sədri Sülhəddin Əkbər bildirib.
Onun sözlərinə görə, partiyanın Nizamnaməsində Məclisin mətbuat orqanı yarada bilməsini nəzərdə tutan müddəa olsa da, bunu düzgün hesab etmir. "Müasir dövrdə partiya liderinin hər hansı mətbuat orqanını təsis etməsi qəbul olunmayan məsələdir", - Məclisin sədri qeyd edib.
Müsavat Partiyası 1911-ci ilin oktyabrında Bakıda yaradılıb. Müsavat Partiyasının (Bərpa) Qurultayı 1992-ci il noyabrın 7-də Bakıda Respublika sarayında keçirilib. Gizli səsvermənin yekunları əsasında Qəmbər əksəriyyət səslə Müsavat Partiyasının başqanı seçilib.
Qəmbər Аzərbаycan Pаrlаmеntinin еks-spikеri (1992-93-cü illərdə) və 2003-cü ildə keçirilmiş prezident seçkisində prezidentliyə namizəd olub. Pаrtiyа 4 nəfər deputatla parlamentdə təmsil olunur.
Məqalə müəllifi ilə əlaqə ünvanı: [email protected]
