Gürcüstan, Tbilisi, 11 may /Trend, müxbir C. Babayeva/
Gürcüstan hökuməti və müxalifəti gürcü-rus münasibətləri barədə eyni fikirləri bölüşürlər, - Gürcüstanın sabiq prezidenti Eduard Şevardnadze belə hesab edir.
"Bu barədə həmfikir olmaq iki ölkə arasında əlaqələrin nizama salınması məqsədi daşıyır. Lakin Rusiyanın Mixail Saakaşvili ilə əlaqələri yaxşı deyil", - Şevardnadze Trend-ə bildirib. - "Prezident Dmitri Medvedev bəyan edib ki, Rusiya Saakaşvili ilə dialoqlara girmək niyyətində deyil".
"Gürcüstan və Rusiya aralarında normal əlaqələr yarana biləcək iki qonşu ölkədir", - eks-prezident deyib.
2008-ci ilin avqust ayında Rusiya Cənubi Osetiya və Abxaziyanın müstəqilliyini tanıyandan sonra, rəsmi Tbilisi Moskva ilə diplomatik əlaqələri pozdu. Diplomatik əlaqələrin pozulmasına baxmayaraq, gürcü müxalifətçiləri - Gürcüstanın keçmiş baş naziri və "Ədalətli Gürcüstan uğrunda" hərəkatının hazırkı başçısı Zurab Noqaideli, "Vahid Gürcüstan demokratik hərəkatı"nın lideri Nino Burcanadze Moskvaya bir neçə dəfə səfər ediblər.