Azərbaycan, Bakı, 12 avqust /Trend, müxbir M.Əliyev/
Azərbaycanın "ELS" Müstəqil Araşdırmalar Mərkəzi avqustun 24-25-də Gəncədə "Qadınların elektoral fəallığının artırılmasında beynəlxalq təcrübənin tətbiqi" adlı beynəlxalq konfrans keçirəcək.
"Konfransın keçirilməsində məqsəd Azərbaycanın qərb regionlarında fəal qadınların Parlament seçkilərinə namizədliyinin irəli sürülməsi prosesi haqqında məlumatlandırmaqdan ibarətdir", - "ELS"-in rəhbəri İradə Yaqubova Trend-ə bildirib.
Onun sözlərinə görə, araşdırma mərkəzinin apardığı sorğu Azərbaycandakı qadınların əksəriyyətinin öz namizədliyini irəli sürmək barədə təsəvvürü yoxdur və bu qadınlara hüquqi və mənəvi dəstək lazımdır.
Azərbaycanda Parlament seçkilərinin keçirilməsi 2010-cu il noyabrın 7-nə təyin olunub. Ölkənin qanunverici orqanına bundanəvvəlki seçkilər 2005-ci ilin noyabrında keçirilib. Azərbaycanda Parlament seçkiləri 125 seçki dairəsində majoritar sistem üzə aparılır.
Yaqubova bildirib ki, 2009-cu il bələdiyyə seçkilərində qadınların fəallığı çox aşağı səviyyədə olub.
Konfransda "ABŞ Seçici Qadınlar Liqası"nın nümayəndələri, ABŞ və Bolqarıstanın digər təşkilatlarından ekspertlər iştirak edəcəklər. Beynəlxalq konfrans Amerikanın Azərbaycandakı Səfirliyinin maliyyə dəstəyi ilə keçiriləcək.
