Azərbaycan, Bakı, 18 avqust /Trend, müxbir M. Əliyev/
Azərbaycan Dövlət Sərhəd Xidmətinin (DSX) əksər şəxsi heyəti 2013-cü ilədək tam müqaviləli xidmətdən ibarət olacaq. Bunu çərşənbə günü jurnalistlərə DSX rəisi Elçin Quliyev bildirib.
"Sərhəd mühafizəsinin təşkili və şəxsi heyətlə komplektləşdirilməsi nöqteyi-nəzərindən bu gün DSX-nin heç bir problemi yoxdur", - o bildirib.
Azərbaycan Sərhəd Qoşunlarının yaranmasının 91-ci ildönümü münasibətilə sərhədçilər Fəxri Xiyabanda ümummilli lider Heydər Əliyevin məzarını və Şəhidlər Xiyabanını ziyarət ediblər.
DSX-nin rəisi, general-leytenant Elçin Quliyevin rəhbərliyi ilə xidmətin əməkdaşları ümummilli lider Heydər Əliyevin məzarına və Şəhidlər Xiyabanındakı abidəyə əklil qoyublar.
18 avqust 1919-cu ildə Azərbaycan Parlamenti "Azərbaycan Respublikasının gömrük baxımından sərhəd mühafizəsinin təsis edilməsi haqqında" qanun qəbul edib. 16 avqust 2000-ci ildə Heydər Əliyevin imzaladığı sərəncamla 18 avqust Sərhəd Qoşunlarının şəxsi heyətinin peşə bayramı kimi təsis edilib.
DSX rəisinin sözlərinə görə, Azərbaycan sərhədçiləri növbəti ildönümünə çox yüksək nəticələrlə, yaxşı əhval-ruhiyyə ilə yaxınlaşıblar.